Nun floras malgrandaj floretoj de folia ajlo. La folioj havas spican odoron kaj guston. Oni uzas ilin por kuiraĵo.
Laŭ mia esploro ĝi ankoraŭ ne havas definitivan nomon en esperanto. Mi provizore nomis ĝin folia ajlo, ĉar oni uzas ĝin por spicado same kiel ajlon. En la japana lingvo ĝi nomiĝas “ニラ (韮, Nira)”. [Allium tuberosum]
Hodiaŭ matene mi rimarkis, ke pipromentoj floras en mia ĝardeneto. Ili portas spikon de malgrandaj blankaj floretoj. Kiam mi staras apud ili, ĉiam ili odoras intense kaj refreŝige spice.
[Mentha piperita]
Hodiaŭ matene floras jen pale purpura floro. Hieraŭ estis purpura floro kun blanka borderaĵo. Tiel la farbito distras nin ĉiumatene.
Farbito floras ankaŭ hodiaŭ matene. Funelforma petalo estas tre fajna kaj preskaŭ diafana sub la matena suno.
[Pharbitis nil Choisy]
Nun floras zefirfloroj, simplaj blankaj floroj, kiujn mi neniam semis en mia ĝardeneto. Certe ilin alportis zefiro! 😉
[Zephyranthes candida (Lindl.) Herb]
