Kategorio: Hajko

    ne atendita
    ekflamo de kolero —
    hajleto batas

    malgrasa mano
    palpe serĉas horloĝon —
    granda malvarmo

    tondante ungojn
    de l’ patrino maljuna —
    vintra sereno

    pezaj ŝvelaĵoj
    en trunko kaj kvar membroj —
    vintra vespero

    brulfumo kreskas
    el falfolia maso —
    ho, nudaj arboj

    konversacio
    kun fotoj en la mano —
    vintra sereno

    litkatenita —
    per okuloj malviglaj
    kion ŝi vidas?

    velkiga vento —
    sur la kutima seĝo
    fremda vizaĝo

    estas malĝojaj
    kaj ĝojaj rememoroj —
    neĝo faladas

    pene skribita,
    ja apenaŭ legebla
    “d-a-n-k-o-n”