Kategorio: Hajko

    ŝaŭmo ŝampua
    pufas per penso plaĉa —
    nokto printempa

    ja surprizite
    mi haltas en aleo —
    sakurblovado

    nu akvobirdo
    ekpaŝas en la fluon —
    sakuraj flosoj

*****
sakuraj flosoj: tiel japanaj hajkistoj diras pri sakuraj petaloj flosantaj sur akvo.

    donas bukedon
    nekutime modesta
    dika knabaĉo

Krom ĉi tiu blogo mi prizorgas du afiŝejojn. Nome, “Hajko en Esperanto” kaj “Verda Kafejo“.
Hodiaŭ la afiŝejo pri hajko atingis la 1000-an afiŝon. Mi tre ĝojas pri mil afiŝoj kaj dankas ĉiujn kontribuintojn.

    ĉirkaŭbrakinte
    bukedon donacitan,
    ekiri disen

    sunbrilo saltas
    sur akvo kaj sur bordo —
    ekvizetŝosoj

ekvizetŝoso: pli precize, reproduktiĝa ŝoso (sporofito) de kampa ekvizeto [Equisetum arvense], ankaŭ nomata “spiko de ekvizeto”, manĝebla. Vidu foton ĉi tie.

    tri-jaraĝa ŝi
    salutas jam gracie —
    pupfesta ĉambro

—–
Hodiaŭ la 3-a de marto estas la pupfesta tago por knabinoj.

    knabeto luktas
    ŝajne kontraŭ monstro —
    herboj ekĝermas

    ne per la aŭto
    sed per piedoj iru —
    printempa suno