Antaŭ semajno mi skribis la artikolon pri blanka kampa krizantemo, kiu ruĝiĝas en mia ĝardeneto.
Jen la krizantemo, kiun mi fotis hodiaŭ post ok tagoj. Ĝi estas ja evidente pli ruĝa ol antaŭe.
Ĉu oni povas klarigi la fenomenon?
Apud blankaj kampaj krizantemoj en mia ĝardeneto floras ankaŭ flavaj kampaj krizantemoj.
Laŭ konsultlibro pri floroj, kampa krizantemo ordinare havas blankajn florojn (kapitulojn), sed foje havas flavajn florojn.
Antaŭhieaŭ mi fotis kampajn krizantemojn en mia ĝardeneto. Tiam mi rimarkis, ke kelkaj el la petaloj estas iomete ruĝetaj.
Hodiaŭ mi refoje fotis la krizntemojn. Nun ruĝetaj petaloj estas pli multaj ol antaŭhieraŭ. Do ili ŝanĝas sian koloron.
kampa krizantemo [Chrysanthemum japonense aŭ Dendranthema occidentali-japonense].
Nun kampaj krizantemoj floras en mia ĝardeneto. Ili portas multajn blankajn florojn (kapitulojn) je 3 cm grandajn. Ili altas ĉirkaŭ ĝis miaj genuoj.
Mi neniam plantis ilin nek semis. Mi supozas, ke antaŭ kelkaj jaroj vento portis la semojn, aŭ ĝia rizomo ŝtele subfosis la betonmuron el la najbara ĝardeno.
Onidire tiu ĉi specio estas la origino de ĝardenaj krizantemoj [Dendranthema x grandiflorum].
kampa krizantemo [Chrysanthemum japonense aŭ Dendranthema occidentali-japonense].
Hodiaŭ mi trovis branĉeton de ora osmanto en florpoto en mia laborejo. Kiam mi preteriris ĝin, dolĉa bonodoro tuŝetis mian nazon.
En meza aŭtuno oni povas trovi orajn osmantojn, kiuj havas bonodorajn oranĝoflavajn floretarojn, tie kaj ĉi tie en Japanio. Oni amas ĝian bonodoron.
Mi tre bedaŭras, ke mi ne povas transsendi la bonodoron per la interreto.
[Osmanthus fragrans var. aurantiacus]
La kosmoso, kiun mia edzino plantis, hodiaŭ havas kvar rozkolorajn florojn. Ĝi altas nur 25 centimetrojn. Ĝi estas tre tre malalta kompare kun ordinaraj kosmosoj. Sed ĝiaj folioj kaj floroj havas normalan grandecon.
— Estus pli bone, se ni plantus ĝin en florpoto kaj metus ĉe fenestro. — Mi kaj mia edzino interparolis.
[Cosmos bipinnatus Cav.]
Mia edzino amas florojn. Antaŭ semajno ŝi aĉetis kosmosidon ĉe floristo kaj plantis ĝin en nia ĝardeneto.
La kosmoso estas malalta, sed nun havas kelkajn butonojn. Baldaŭ ili ekfloros. Ni atendas florojn, supozante kian koloron ili havos.
[Cosmos]
Ĉi-jare farbitoj floras plejmulte kun purpuraj floroj. Tamen fojfoje troviĝas variantaj floroj. Hodiaŭ jen purpura petalo kun ruĝaj makuloj. La makuloj ŝajnigas flugantajn birdetojn.
Ĉiumatene floras novaj floroj de farbito, tamen lastatempe malpli grandaj ol antaŭe. Hodiaŭ purpura floro kun blankaj makuletoj ĉe la rando.
Antaŭe mi skribis ke la scienca nomo de farbito estas Pharbitis nil. Sed laŭ lastatempaj studoj, plimultaj botanikistoj nomas ĝin Ipomoea nil. (laŭ la informo de fotono, dankon!)
[Ipomoea nil (L.) Roth]
Volvotigo plektiĝas ĉe la dratreto de mia ĝardeneto. Nun floras malgrandaj kloŝformaj blankaj floroj. Ĝi estas Paederia scandens, japanlingve “ヘクソカズラ (屁糞葛, Hekusokazura)”.
Ĝi ankoraŭ ne havas esperantan nomon. Hekuso-kazura en la japana signifas furzofekan volvotigon, kiu devenas onidire pro tio, ke ĉifite ĝi odoras malbone. Ja kompatinda herbo! Tamen laŭ mia nazo ĝi odoras iom acide kaj herbece, sed ne malbone.
Kiel mi nomu ĝin? Laŭ la metodo de PIV provizore mi prenos genronomon el ĝia scienca nomo. Do ĝi estas pederio. Ĉu vi konsentas kun mi? 🙂
[Paederia scandens (Lour.) Merr.]