Pluvego atakas Japanion

En Japanio lastatempe ni fojfoje havas pluvegojn. Ekde hieraŭ vespere ĝis hodiaŭ frumatene falis intensa pluvo en la Kantoa kaj la Tokaja regionoj (la centra Japanio). En la urbo Okazaki de la gubernio Aiĉi (la Tokaja regiono) falis 147 mm da pluvo en unu horo ekde la 1-a atm en la 29-a tago. Ĉi tio estas la 7-a plej intensa pluvego el la registraĵoj de la Japana Meteologia Subministerio. Pro la pluvego rivero inundis la urbon. Multaj domoj mergiĝis ĝis la supro de planko. El la loĝantoj unu pereis kaj pluraj perdiĝis.

Postvenintaj hibakŝoj

Hibakŝoj (aŭ hibakuŝoj/atombombitoj) estas viktimoj de radioaktiveco kaŭzita de la du atombomboj en Hiroŝimo kaj Nagasako. Plimulto el ili estis rekte trafitaj de eksplodo de la atombomboj. Sed ankaŭ ekzsitas tiuj, kiuj, ne atombombite, envenis en la urbojn post la bombeksplodo kaj ricevis altenergiajn radiojn el postrestantaj radioaktivaĵoj. Ili estas postvenintaj hibakŝoj.
Iu virino, tiutempe 17-jara, eniris en la urbon Hiroŝimo 13 tagojn poste de la bombeksplodo kaj laboradis flegante atombombitajn viktimojn en lernejo apud la eksplodcentro. Poste reveninte al sia hejmurbo for de Hiroŝimo, ŝi rimarkis, ke ŝiaj haroj forfalis amase kaj ke purpuraj makuletoj aperis sur ŝia vizaĝo. Tiutempe ŝi ne konsciis, ke ili estas sindromo de atombombitoj. Kaj poste ŝi estis trafita de tri-specaj kanceroj sinsekve.
Nun ŝi ekkonsciis, ke ŝiaj malsanoj okazis pro atombomba radioaktiveco. Malgraŭ ŝia peto la japana registaro ne agnoskas, ke ŝia malsano estas atommalsano, sin pravigante per DS86, la kriterio por taksi eksponan dozon de hibakŝoj. Tamen ekzaktecon de la kriterio nun dubas ne malmultaj sciencistoj kaj medicinistoj.

Vakcinado kontraŭ novspeca gripo

La Japana Ministerio pri Sano, Laboro kaj Bonfarto komencis klinikan esploradon por preventi eblan grandan epidemion de novspeca gripo. Oni inokulis volontulajn kuracistojn kaj flegistojn en Tokio per vakcino preparita el la viruso H5N1, kiu kaŭzas plej danĝeran birdogripon.
La ministerio planas vakcini sume 6400 hospitalajn laboristojn kaj akiri konkludon pri efikeco kaj sekureco de antaŭepidemia vakcinado en la venonta printempo. Konfirmante efikecon kaj sekurecon de la vakcino, ĝi inokulos dek milionojn da personaro kiel policanojn, elektrolaboristojn ktp.

Varma akvo glaciiĝas pli rapide !?

Inter japanaj sciencemuloj okazas disputoj pri Mpemba-efiko.
La 9-an de julio japana televid-stacio NHK elsendis programon, en kiu oni prezentis fenomenon, ke varma akvo glaciiĝas pli rapide ol malvarma akvo en frostigujo de hejma fridujo. Post la elsendo iu fizikisto en sia blogo kritikis la programon, ke ĝi estas malĝusta laŭ la sciencaj leĝoj. Li konstatis, ke tia fenomeno ne okazis en lia propra eksperimento.
Nun multaj sciencemuloj disputas por kaj kontraŭ la fenomeno per retaj blogoj.

Ekonomio

Japanaj amaskomunikiloj raportas, ke rompiĝis la Doha ciklo de la Monda Organizo pri Komerco (MOK). Dum japanaj agrikulturistoj, kiuj deziras protekti enlandan produktadon, retrankviliĝas pro malsukceso de la intertrakto, aliflanke japanaj fabrikistoj, kiuj deziras plifaciligi vendadon al evolulandoj, malesperiĝas pro stagno de libera komerco.
Ĉiuj membrolandoj de MOK estas malkontentaj pro la malsukceso, tamen ili ne atingas interkonsenton. Al mi estas tre komplika la ekonomia sistemo.

Amikecon inter korea kaj japana popoloj

Post kiam la japana registaro decidis priskribi teritorian problemon pri la insulo Takeŝima (Dokdo en la korea) en gvidlibro por lernejaj instruistoj, la korea registaro kolere reagis kaj streĉigis la rilatojn inter du landoj. Tiu ĉi revokis sian ambasadoron el Japanio. Pluraj civilaj grupoj de Koreio, kiuj planis amikecan viziton al Japanio, laŭvice anoncis ĉesigon de la vizitplano protestante kontraŭ la priskribado.
Malgraŭ tia atmosfero grupo da universitataj studentoj el Busano, Koreio, hieraŭ vizitis la urbon Karacu, kiu situas ĉe la norda marbordo de la insulego Kiuŝuo, kie mi loĝas. Ili asertas, ke la teritoria problemo estas tasko de politikistoj kaj ke ĝi ne koncernas civilajn rilatojn.
Mi ja konsentas kun ili. Ni bezonas trankvilan interparolon por flegi amikecon inter du popoloj.

Korupta skandalo

Lastatempe en najbara gubernio okazas korupta skandalo pri dungekzameno de instruistoj por publikaj lernejoj. Altranga oficisto de gubernia eduka komiato estas arestita pro suspekto de koruptiĝo, ke li ricevis monon rekompence de kontraŭregula sukcesigo al pluraj ekzamenitoj, kies gepatro, lernejestro de elementa lernejo, petis sukcesigon per mondonaco. Ankaŭ alia altranga oficisto de la eduka komitato estas suspektata pri kunkulpeco.
Oni indignas pro la maljustaĵo de edukistoj.

Rabokapto de aŭtobuso

Hodiaŭ 14-jara knabo rabokaptis aŭtobuson, minacante ĝian ŝoforon per du tranĉiloj. Li ordonis al la ŝoforo plu veturigi. Li forprenis poŝtelefonon de la ŝoforo kaj mem telefonis al polico, ke li rabokaptis la aŭtobuson.
Post unu horo la knabo kapitulaciis pro persvado de alvenintaj policanoj. Pridemandite de la polico, li respondis: Ĉar gepatroj riproĉis min, mi volis venĝi min, farante sensacion en la mondo.

Fiŝistoj strikas

7000 fiŝistoj en mia gubernio strikas dum 24 horoj hodiaŭ. Ili plendas pri sia malfacila situacio pro prezaltiĝo de nafto (=kruda petrolo). La prezo de malpeza oleo, brulaĵo de fiŝboato, fariĝis duoble alta kompare kun la lasta jaro. Ili diras, ke ili malprofitas de fiŝkaptado, ĉar nun estas malfacile altigi prezon de fiŝoj. Ili timas eblan rezignon pri fiŝista laboro, kaj petas helpon de la registaro.
En la 15-a de julio strikos 200 000 fiŝboatoj en la tuta Japanio, apelaciante la samon.

Prezaltiĝo de benzino

En Japanio prezaro de konsumaĵoj pli kaj pli altiĝas. La plej grava pezaltiĝo estas tiu de benzino. En oktobro 2007, unu litro da benzino kostis meznombre ĉ. 130 enojn. Nun, en julio 2008, ĝi kostas ĉ. 180 enojn, do pli alta je 38 procentoj ol la lasta oktobro.
La prezaltiĝo de benzino influas diversajn flankojn de nia vivo. Multaj reduktas veturigi aŭtomobilon. Kelkaj rezignas posedi aŭtomobilon. Kamionistoj kaj aliaj transportistoj suferas pro deficito.