Mi trovis interesan blogon plenan de fotoj pri japanaj ĉiutagaĵoj. Jen la adreso:
http://pub.ne.jp/ryonryon/
La bloganto afiŝas multajn fotojn kaj koncize priskribas ĉiutagajn okazintaĵojn. Ĉu vi iam vizitis la japanan parlamentejon? Se ne, bonvole provu ĉi-majajn artikolojn. Ekzemple:
http://pub.ne.jp/ryonryon/?entry_id=709552
Bedaŭrinde li ne afiŝas novan artikolon ĉi-monate. Mi esperas, ke li renovigos la blogon plu.
jen ĉiu korvo
sur sia arbopinto —
aŭtunvespero
Ekde morgaŭ alilandanoj, kiuj volas eniri en Japanion, devos fingropremi kaj vizaĝofotiĝi ĉe flug- kaj ŝiphaveno. Se li aŭ ŝi rifuzos fingropremon aŭ vizaĝofotiĝon, oni ne permesos al tiu enlandiĝi. Tiel la Japana registaro ŝanĝis koncernan leĝon, sekvante la politikon de la Usona registaro.
Mi hontas pri tia ago de la Japana registaro, kiu traktas alilandanojn kvazaŭ krimulojn.
La Japana Federacio de Advokataroj malaprobas la leĝon, asertante ke la fingropremo atencas homrajton kaj privatecon de alilandanoj, kaj ke ne certas administrado kaj gardado de akiritaj informoj laŭ la leĝo.
Mi iris al butikego de elektroaparatoj. Sur unu el la montrotabloj oni metis ĉ. 20 varojn de diversmarkaj ciferecaj fotiloj. Mi provis manipulante kelkajn kompaktajn fotilojn. Unu el ili, FinePix [Fajnpiks] F31fd, plaĉis al mi.
Mi demandis al vendisto, ĉu ĝi estas en la stoko. Li ekzamenis kaj respondis, ke ĝi ne estas en la stoko, kaj ke oni vendas nur la montrovaron. Do mi hezitis, ĉu mi aĉetu ĝin aŭ ne. Ĉar verŝajne multaj aĉetontoj manipulis senatente la montrovaron. Povas esti ia nevidebla difekteto en ĝi. Tial mi rezignis aĉeton ĉi-foje.
Ĉar en ĉi tiu aŭtuno daŭris varm(eg)aj tagoj, ruĝiĝo de folioj estas malfrua kompare kun meza jaro.
Hodiaŭ mi iris al krakbutiko por aĉeti panon, kaj survoje mi trovis roŭson bele ruĝiĝanta ĉe iu kanalo.
roŭso: Rhus succedanea, falfolia arbo el la genro sumakoj el la familio anakardiacoj. Ĝiaj plume kunmetitaj folioj bele ruĝiĝas en aŭtuno. Ĝi estis enportita en Japanion ĉirkaŭ la 16-a jarcento. Oni ekstraktas vakson el ĝiaj fruktoj.
Se oni tuŝas roŭson, foje oni havas haŭtinflamon. Kiam mi estis infano, plenaĝuloj admonis min ne alproksimiĝi al roŭsoj.
Antaŭ unu semajno mi plendis pri ekstersezona varmeco. Nu, hieraŭ kaj hodiaŭ la temperaturo fariĝis tute normala. Hieraŭ la minimuma estis 7,4 celsigradoj kaj la maksimuma 18,7. Hodiaŭ 10,1 kaj 16,8.
Mi aldone surmetis veŝton por ne malvarmumi.
Tie kaj ĉi tie en mia ĉirkaŭaĵo mi vidas kampajn krizantemojn ĉarme florantaj. Ili ŝajne havas diversajn variaĵojn kaj kultivoformojn. Iliaj floroj estas malgrandaj kompare kun ĝardenaj krizantemoj, sed ili estas diverse koloraj kaj freŝe odoras.
Kuiristo laboranta ĉe restoracio falis pro cerba infarkto (hista mortiĝo pro sangovaza ŝtopiĝo). Oni portis lin en hospitalon. La hospitalo demandis lian patrinon detale pri asekuro kaj pago. Tuj antaŭ sia falo li kontraktis pri sanasekuro, kiu tamen validiĝos post unu monato. La asekurkompanio rifuzis pagi por li. Lia familio petis tujan operacion al la hospitalo, sed ĉi tiu ne aprobis pri urĝeco de lia operacio. Li mortis en la hospitalo post 4 monatoj, atendante operacion. La hospitalo alsendis fakturon de 42 000 dolaroj al la postlasita familio.
Estas ja terura rakonto. Sed tio fakte okazis en Usono. Tion raportas iu japana ĵurnalo.
Japana popularscienca gazeto raportas, ke ĉi-septembre areo de la glacioj, kovrantaj la Arktan Oceanon, estis la plej malgranda en ĉi tiuj 30 jaroj.
Sciencisto klarigas la fenomenon per du kaŭzoj. La unua kaŭzo estas tio, ke temperaturo de la marakvo pli altiĝis kaj malhelpis la glaciojn kreski. La dua estas tio, ke la granda disrompiĝo de glaciamaso, okazinta ĉi-junie en la nordo de Kanado, faris la glaciojn facile moveblaj. Kaj ĉi-somere ciklono staranta ĉirkaŭ Siberio per siaj sudaj ventoj elpelis moveblajn glaciojn al la Atlantika Oceano.
La sciencisto asertas, ke ĝis nun oni ne taksis ĉi tian mekanismon grava, kaj ke oni ŝanĝos prognozon pri la glacioj de la Arkta Oceano.
Daŭros malfacilaj tagoj al polusaj ursoj.
gastama ĉambro —
krizantemoj en poto
fajne odoras
Kiam mi unuafoje legis la difinon de “orfo” en PIV, mi estis mirigita. Ĝi diras:
orf/o. Knabo, kies gepatroj, aŭ nur unu el ili, mortis.
Ĉar la japana ekvivalento de “orfo” estas kaj knabo kaj knabino, mi demandis min, de kie venis tia seksobsedata difino. Almenaŭ en la angla, kiun mi lernis, “orphan” signifas ne nur knabon.
Lastatempe mi legis la difinon de “orfo” en ReVo (http://purl.org/net/voko/revo/). Ĝi diras:
orf/o: Knabo aŭ knabino, kies patro aŭ patrino mortis.
Ĉi tiu difino estas ĝoja surprizo al mi, ĉar ReVo en sia starto enhavis la difinon de Plena Vortaro, kiu estis esence sama al tiu de PIV. Do ReVuloj verŝajne ŝanĝis la difinon, ekkonsciinte problemon de la difino de PV/PIV. Gratulon al ReVuloj!