Hodiaŭ posttagmeze okazis pasema pluvo kun fulmotondro.
Tagmeze la suno brilegis en la ĉielo kun iom da blankaj nuboj. Ĉirkaŭ je la 3-a horo mi ekaŭdis tondreton en malproksimo kaj rimarkis, ke amasego da nigra nubo proksimiĝas de oriento. Sed tiam la suno ankoraŭ brilis kaj la ĉielo estis ĝenerale hela.
Duonhoron poste la ĉielo estis ankoraŭ hela, sed ekfalis pluvgutoj. La pluvo pli kaj pli intensiĝis. Mi vidis, ke en norda ĉielo trapasas nigra nubamaso, en kiu fulmas kaj tondras multfoje. Nuboj iris de oriento al okcidento.
Kaj duonhoron pli poste la nigra nubamaso jam pasis. La pluvo malintensiĝis kaj ĉesis. Je la 5-a horo la ĉielo estis ree hela.
Ĉar ordinare en mia regiono nuboj venas de okcidento kaj iras al oriento, hodiaŭa pluvo estas ja malofta okazo.
Kategorio: Ĉiutaga vivo
Diagnozo
Hodiaŭ mi vizitis fakon pri interna medicino de la hospitalo, kiu estas proksime de mia domo. Mi plendis al kuracisto pri mia kapdoloro. Aŭskultinte min, li diagnozis, ke la kapdoloro povas esti kaŭzita de hipertoniaj muskoloj (trostreĉitaj muskoloj). Li preskribis pilolojn da Myonal [pr. miona:l] (eperisona hidroklorido), kiu reduktos funkciadon de centra nervo kaj sekve malstreĉos muskolojn.
Mi prenas po unu pilolon post ĉiu manĝo.
Do mi vidos sekvojn.
Kaŝtanarbo
Mi trovis junan kaŝtanarbon en la malgranda sanktejo, kiun mi jam priparolis (ĉi tie).
Ĝi estas du-tri metrojn alta juna arbo, sed jam portas kelkajn fruktojn kun verda dornoŝelo de ĉ. kvin-centimetra diametro.
Estas malofte trovi kaŝtanarbojn ĉirkaŭ mia urbo. Mi ĝojas kaj antaŭzorgas, ĉu la kaŝtanoj plene maturiĝos en aŭtuno.
Transa grasacido
Vendrede en Kalifornio, Usono, estis aprobita nova leĝo, kiu malpermesas uzon de margarino kaj aliaj grasoj kaj oleoj, kiuj inkludas transajn grasacidojn.
Transa grasacido estas, pli precize, trans-tipa nesaturita grasacido, kiu estiĝas en fabrikado de hidrogenizitaj grasoj kaj oleoj. Medicinistoj averats, ke multe da transaj grasacidoj en homa korpo altigas danĝeron de ateriosklerozo (malmoliĝo de aterio) kaj aliaj malsanoj.
Ĝenerale Japanio postkuras Usonon kun malfruiĝo de kelke da jaroj. Do, kio okazos al mia margarino, kiun mi manĝas kun rostita panpeco ĉiumatene?
Hodiaŭa ĝuo
Daŭras varmegaj tagoj. Hodiaŭ la maksimuma temperaturo estis 32,7 celsigradoj kaj la minimuma estis 24,7 celsigradoj.
La kapdoloro iom mildiĝis. Pli-malpli tolerebla. Tamen ĝi obstine restas sur mia kranio.
Mi kaj mia edzino vizitis la kutiman dolĉaĵejon kaj aĉetis manĵuojn. Bedaŭrinde oni alitigis prezon de la manĵuo al 65 enoj ekde ĉi-jara printempo. Ni aĉetis ankaŭ kukojn kaj en la angulo de la vendejo ni ĝuis ilin kun senpaga kafo.
Kapdoloro
Mia kapo doloras. Precipe doloras interna flanko de la kranio. Mi sentas kvazaŭ mia cerbo estas forte ĉirkaŭpremita de fera ringo.
Dum lastaj kelkaj tagoj la doloro foje intensiĝis kaj foje malintensiĝis. Nun ĝi estas la plej intensa ol ĝis nun. Ho ve!
Fari kolorojn
Hodiaŭ mi partoprenis en la kurso de pentrado (ĉi tie). Ĉi-foje ni pentris fiŝojn. Mi elektis plekogloson kiel modelon.
Estas tre malfacile trovi ĝustan koloron de ĉiu parto de la fiŝo. Mi devas fari necesan koloron, miksante plurajn farbojn. Mi penis, sed bedaŭrinde miaj koloroj ne bone respegulas realajn kolorojn de la fiŝo.
Mi ekkonis komplikecon de la naturaj koloroj.
******
plekogloso : Plecoglossus altivelis, fiŝo el osmeroformoj (aŭ salmonoformoj). Ĝi vivas plejparte en akvopura rivero, kun svelta korpo longa je dekkelkaj centimetroj. Japanoj ŝatas manĝi plekogloson kaj taksas ĝin kiel plej bongustan riverfiŝon.
Prezaltiĝo de benzino
En Japanio prezaro de konsumaĵoj pli kaj pli altiĝas. La plej grava pezaltiĝo estas tiu de benzino. En oktobro 2007, unu litro da benzino kostis meznombre ĉ. 130 enojn. Nun, en julio 2008, ĝi kostas ĉ. 180 enojn, do pli alta je 38 procentoj ol la lasta oktobro.
La prezaltiĝo de benzino influas diversajn flankojn de nia vivo. Multaj reduktas veturigi aŭtomobilon. Kelkaj rezignas posedi aŭtomobilon. Kamionistoj kaj aliaj transportistoj suferas pro deficito.
Finiĝis la pluvsezono
Hodiaŭ la distrikta meteologia observatorio anoncis, ke la pluvsezono finiĝis en la regiono. La dato estas 12 tagojn pli frua ol en la ordinara jaro, kaj 17 tagojn pli frua ol en la lasta jaro.
En nia regiono oni havis 539 mm da precipitaĵo dum ĉi tiu pluvsezono, kiu estas 140 % pli granda ol tiu de la ordinara jaro.
Ja komenciĝis vera somero! Hodiaŭa maksimuma temperaturo estis 32,2 celsigradoj, kaj la minimuma estis 25,0 celsigradoj.
Iom da sojo
Hodiaŭ mi kuiris viandon kun terpomoj (nikuĝaga, ĉi tie). Tamen ĉi-foje mi ne sukcesis bone gustigi ĝin. Ĝi estis iomete gustomanka. Mi enmetis malpli da sojo (sojsaŭco), ĉar lastatempe mi malsukcesis gustigi kun pli da sojo.
Morgaŭ mi prove aldonos iometon da sojo.